କଟକ, (ବିନାୟକ ନିୟୁଜ୍) ଓଡ଼ିଶା ଡିଜିଟାଲ ମିଡ଼ିଆ ମହାସଂଘ କଟକ ଜିଲ୍ଲା କମିଟି ତରଫରୁ ସାଲେପୁର ଠାରେ ଏକ ବନ୍ଧୁ ମିଳନ କାର୍ଯ୍ୟକ୍ରମ ଆଡ଼ମ୍ବରପୂର୍ଣ୍ଣ ଭାବେ ଅନୁଷ୍ଠିତ ହୋଇଯାଇଛି।
ଏହି କାର୍ଯ୍ୟକ୍ରମରେ ମହାସଂଘର ରାଜ୍ୟ କାର୍ଯ୍ୟକାରୀ ସଭାପତି ଶ୍ରୀଯୁକ୍ତ ସୂର୍ଯ୍ୟକାନ୍ତ ଖେଡୁୱାଲ୍ ସିଂ, ରାଜ୍ୟ ସାଧାରଣ ସମ୍ପାଦକ ଶ୍ରୀଯୁକ୍ତ କବିରାଜ ପାତ୍ର ଏବଂ ରାଜ୍ୟ ଲିଗାଲ ସେଲ୍ର ସଂଯୋଜକ ଆଡଭୋକେଟ୍ ପ୍ରଭାତ କୁମାର ବାରିକ ପ୍ରମୁଖ ଯୋଗଦେଇଥିଲେ। ନିଜ ନିଜ ବକ୍ତବ୍ୟରେ ସେମାନେ ସଂଗଠନର ସାଂଗଠନିକ ସୁଦୃଢ଼ୀକରଣ, ଡିଜିଟାଲ ଗଣମାଧ୍ୟମର ବୈଷୟିକ ଜ୍ଞାନକୌଶଳ, ଆଇନଗତ ସଚେତନତା ଏବଂ ଆଗାମୀ କାର୍ଯ୍ୟପନ୍ଥା ସମ୍ପର୍କରେ ସବିଶେଷ ଆଲୋଚନା କରିଥିଲେ।
ଏହି ସମାରୋହରେ ‘ପ୍ରତିକାର ନ୍ୟୁଜ୍’ର ସମ୍ପାଦକ ଶୁଭାଶିଷ ମିଶ୍ର ମୁଖ୍ୟ ଅତିଥି ଭାବେ ଯୋଗଦେଇଥିବା ବେଳେ ‘ସାଲେପୁର ପବ୍ଲିକ୍ ସ୍କୁଲ୍’ର ପରିଚାଳନା ନିର୍ଦ୍ଦେଶିକା (MD) ଶ୍ରୀମତୀ ଜୟନ୍ତୀ ମିଶ୍ର ସମ୍ମାନିତ ଅତିଥି ଭାବେ ଯୋଗଦେଇଥିଲେ। ସାମ୍ବାଦିକତା କ୍ଷେତ୍ରରେ ସଂଗଠନର ଗୁରୁତ୍ୱପୂର୍ଣ୍ଣ ଭୂମିକା ଓ ଦାୟିତ୍ୱବୋଧ ଉପରେ ଅତିଥିମାନେ ଆଲୋକପାତ କରିଥିଲେ।
ଏହି କାର୍ଯ୍ୟକ୍ରମରେ ଆଖପାଖ ଅଞ୍ଚଳର ବହୁସଂଖ୍ୟକ ଡିଜିଟାଲ ଓ ବୈଦ୍ୟୁତିକ ଗଣମାଧ୍ୟମର ସାମ୍ବାଦିକ ଯୋଗଦେଇଥିଲେ। ଶେଷରେ ଓଡ଼ିଶା ଡିଜିଟାଲ ମିଡ଼ିଆ ମହାସଂଘର ରାଜ୍ୟ ଜୋନାଲ ସାଂଗଠନିକ ସମ୍ପାଦକ ଶ୍ରୀଯୁକ୍ତ ଜଗତ ବଲ୍ଲଭ ନନ୍ଦ ସମସ୍ତଙ୍କୁ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ ।
