ଭୁବନେଶ୍ୱର: କୋଟିଆ ସୀମା ବିବାଦର ସ୍ଥାୟୀ ସମାଧାନ ହୋଇପାରୁ ନ ଥିବାରୁ ରାଜ୍ୟ ସରକାରଙ୍କୁ ସମାଲୋଚନା କରିଛନ୍ତି ଓଡ଼ିଶା ପ୍ରଦେଶ କଂଗ୍ରେସ କମିଟି (ଓପିସିସି) ସଭାପତି ଭକ୍ତ ଚରଣ ଦାସ। ଗୁରୁବାର ସେ ପ୍ରଶାସନିକ ଅପାରଗତା ଓ ଦୂରଦୃଷ୍ଟିର ଅଭାବକୁ ଏହି ସମସ୍ୟାର ମୁଖ୍ୟ କାରଣ ବୋଲି ଦର୍ଶାଇବା ସହ ବିବାଦର ସମାଧାନ ପାଇଁ ତୁରନ୍ତ ରାଜନୈତିକ ଓ କୂଟନୈତିକ ଆଲୋଚନା ଆରମ୍ଭ କରିବାକୁ ଦାବି କରିଛନ୍ତି। ଆନ୍ଧ୍ରପ୍ରଦେଶ ପକ୍ଷରୁ କୋଟିଆ ଅଞ୍ଚଳରେ ନିର୍ବାଚନ କରାଇବା ପାଇଁ ବିଜ୍ଞପ୍ତି ପ୍ରକାଶ ପାଇବା ପରେ ଏହି ପ୍ରସଙ୍ଗ ପୁଣି ରାଜ୍ୟ ରାଜନୀତିରେ ଚର୍ଚ୍ଚାର କେନ୍ଦ୍ରକୁ ଆସିଛି।
ଭକ୍ତ ଦାସ କହିଛନ୍ତି ଯେ କୋଟିଆ ଓଡ଼ିଶାର ଅବିଚ୍ଛେଦ୍ୟ ଅଙ୍ଗ ଏବଂ ଓଡ଼ିଆ ଅସ୍ମିତା ଓ ସ୍ୱାଭିମାନର ପ୍ରତୀକ। ତେଣୁ ଏହି ଅଞ୍ଚଳର ସ୍ଥିତି ଓ ଅଧିକାରକୁ ନେଇ ରାଜ୍ୟ ସରକାର ଅଧିକ ଦୃଢ଼ ଆଭିମୁଖ୍ୟ ଗ୍ରହଣ କରିବା ଆବଶ୍ୟକ। କେନ୍ଦ୍ର ସରକାର, ଓଡ଼ିଶା ଓ ଆନ୍ଧ୍ରପ୍ରଦେଶରେ ସମାନ ବିଚାରଧାରାର ସରକାର ଥିବାରୁ ଆଲୋଚନା ମାଧ୍ୟମରେ ବିବାଦର ସମାଧାନ ପାଇଁ ଏହା ଉପଯୁକ୍ତ ସମୟ ବୋଲି ସେ ମତ ଦେଇଛନ୍ତି। ଦୀର୍ଘଦିନ ଧରି କେବଳ ଆଇନଗତ ପ୍ରକ୍ରିୟା ଉପରେ ନିର୍ଭର ନ କରି ରାଜନୈତିକ ଓ ପ୍ରଶାସନିକ ସ୍ତରରେ ଠୋସ୍ ପଦକ୍ଷେପ ନେବାକୁ ସେ ଗୁରୁତ୍ୱାରୋପ କରିଛନ୍ତି।
କୋଟିଆ ବିବାଦର ସମାଧାନ ପାଇଁ ପୂର୍ବରୁ ସ୍ୱତନ୍ତ୍ର କମିଟି ଗଠନ, ଅଧିକାରୀ ସ୍ତରୀୟ ବୈଠକ ଓ ବିଭିନ୍ନ ରିପୋର୍ଟ ପ୍ରସ୍ତୁତି ହୋଇଥିଲେ ମଧ୍ୟ ଏଯାଏଁ ସ୍ଥାୟୀ ସମାଧାନ ମିଳିପାରିନାହିଁ ବୋଲି ଭକ୍ତ ଦାସ ପ୍ରଶ୍ନ ଉଠାଇଛନ୍ତି। ଆନ୍ଧ୍ରପ୍ରଦେଶ ପ୍ରତି ଓଡ଼ିଶା ସରକାରଙ୍କ ଆଭିମୁଖ୍ୟ ଦୁର୍ବଳ ରହିଥିବା ମଧ୍ୟ ସେ ଅଭିଯୋଗ କରିଛନ୍ତି। ତାଙ୍କ ମତରେ, ଏହି ସମସ୍ୟାର ସମାଧାନ ପାଇଁ ଦୁଇ ରାଜ୍ୟ ମଧ୍ୟରେ ନିୟମିତ ଆଲୋଚନା ସହ ସ୍ପଷ୍ଟ ରଣନୀତି ଓ ସମୟବଦ୍ଧ ପଦକ୍ଷେପ ଆବଶ୍ୟକ।
ଓଡ଼ିଶା-ଆନ୍ଧ୍ରପ୍ରଦେଶ ସୀମାରେ ଥିବା କୋଟିଆ ଗ୍ରାମପୁଞ୍ଜକୁ ନେଇ ଦୀର୍ଘଦିନ ଧରି ଦୁଇ ରାଜ୍ୟ ମଧ୍ୟରେ ବିବାଦ ଲାଗି ରହିଛି। ଏହି ମାମଲାରେ ଓଡ଼ିଶାର ତତ୍କାଳୀନ ସରକାର ୨୦୦୬ ମସିହାରେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ ମଧ୍ୟ ଆବେଦନ ଖାରଜ ହୋଇଥିଲା। ପରେ ୨୦୨୨ ମସିହାରେ ଆଉ ଏକ ମାମଲା ଦାଖଲ କରାଯାଇଥିଲା, ଯାହା ବର୍ତ୍ତମାନ ସୁପ୍ରିମକୋର୍ଟରେ ବିଚାରାଧୀନ ରହିଛି। ଏଭଳି ସ୍ଥିତିରେ କୋଟିଆ ବିବାଦର ସ୍ଥାୟୀ ସମାଧାନ ପାଇଁ ଆଇନଗତ ପଦକ୍ଷେପ ସହ ଆଲୋଚନା ଓ ପ୍ରଭାବଶାଳୀ ପ୍ରଶାସନିକ ହସ୍ତକ୍ଷେପ ଉପରେ ଗୁରୁତ୍ୱ ଦିଆଯାଉଛି।
